منتدي بحر الكلمات للشعر والادب *** كان زمان*** بقلم الشاعر : وحيد محروس

كان زمان 
كان زمان الحمل خفيف 
وسما صافية وهواها نضيف 
وضحكة مصرى كريم وعفيف
وست بتخبز وبترسم على خد رغيف 
وغيطان مليانة بالخضرة 
وسواقي دايرة وبتغني لجمال الريف 
وقمر منور في سمانا ونسمة 
تخدنا في أحضانها من شمسة صيف 
وكانت الصحة مساعدتنا حتى المرض 
لما بيجي كان زي الضيف 
دلوقت تقل الحمل ومال 
فقر وغلا وكتر عيال 
وغيطان مليانة أسمنت وطوب 
والدنيا صبحت ماشية شمال 
وإن قلت ياناس كدة مايصحش 
قالوأ معانا عقد ومكتوب 
وشبابنا قاعد ع الكافيهات 
والفيس بوك واللاب توب 
معدش فيه قيم وعادات 
والهرم في مكانه بقى مقلوب 

بقلمي / الشاعر وحيد محروس