شعر عامي
( أنا مين )
أنا مين
وترتيبي كام
بين البني آدمين
عايش مابين
أهلي وصحبتي
وحاسس بغربتي
وعذاب السنين
أنا مين
كل حاجة اتغيرت
حتى الوشوش
والحقايق إتزورت
وبقت رتوش
وأيامي غريبة
كأني معرفتهاش
والناس كئيبة
وقسوتها
ماتتوصاش
فين البركة والطيبة
يارتها دامت
قيم كتير اتبعترت
حاسس وكأن
القيامة قامت
بقى إللي ماشي
في الزمان دا
هو الجنيه
طب الغلابة زيينا
يعملوا إيه
والدنيا جاية ليه
دايما علينا
وبقت دنية
مصالح
مطلوب مننا
نتحمل
ونصبر ونسامح
عايشين زمن غادر
زي العبيد
خلاص ياناس
مش قادر
ومكتوف الإيد
عايش حرب وصراع
علشان لقمة عيش
وكرامتي صبحت
في الحضيض
وماتساويش
ذل ومهانة لجل الفلوس
والناس رخيصة
ومايملكوش
طب ليه يادنيا
تجرحيني دا أنا
حبيتك
ولو كنت اعرف
النصيب ماكنت
جيتك
حتى الصحاب باعوني
وغدروا بيا
ودا شئ عادي
ومش غريب
في أيامنا دية
ارحمني يارب برحمتك
ما أنت أرحم الراحمين
يمكن تحلالي دنيتي
وأعرف أنا مين
بقلمي / الشاعر وحيد محروس
ليست هناك تعليقات:
إرسال تعليق